Nyamagabe Yakiriye Itsinda rya Banki y’Isi na REMA ku Ishyirwa mu Bikorwa ry’Umushinga Nyungwe–Ruhango Corridor

Kuri uyu wa 27 Nyakanga 2026, Umuyobozi w’Akarere ka Nyamagabe, Bwana Hildebrand NIYOMWUNGERI, ari kumwe n’Umuyobozi w’Akarere Wungirije Ushinzwe Iterambere ry’Ubukungu, Bwana Thaddée HABIMANA, yakiriye itsinda ryaturutse muri Banki y’Isi riri kumwe n’iryaturutse mu Kigo cy’Igihugu Gishinzwe Kubungabunga Ibidukikije (REMA).

Mu biganiro bagiranye, barebeye hamwe ibikenewe kugira ngo ishyirwa mu bikorwa ry’Umushinga Nyungwe–Ruhango Corridor rizagende neza mu Mirenge itatu y’Akarere uzakorwamo. Uyu mushinga ugamije gusubiranya urusobe rw’ibinyabuzima n’ibidukikije byangiritse no gufasha abaturage guhangana n’imihindagurikire y’ikirere.

Meya NIYOMWUNGERI yashimiye abaterankunga b’uyu mushinga bahisemo Akarere ka Nyamagabe nk’akarere gafite igice kinini kibasirwa n’ibiza, agaragaza ko umushinga uzagira uruhare mu kurengera ibidukikije no kuzamura imibereho y’abaturage.

Nyuma y’ibiganiro, aya matsinda aherekejwe na Visi Meya Thaddée HABIMANA yasuye Igishanga cya Mwogo giherereye mu Murenge wa Kamegeri, kimwe mu bice biteganyijwe gukorerwamo ibikorwa by’uyu mushinga.

Hanabaye amahugurwa ku mabwiriza yo kurengera ibidukikije n’imibereho myiza azakurikizwa mu gihe umushinga uzaba ushyirwa mu bikorwa (Environmental and Social Framework and Guidance and Policies to Comply with the Project at the time of Project implementation), hagamijwe ko ibikorwa byose bizakorwa byubahiriza amahame yo kurengera ibidukikije no kubungabunga imibereho myiza y’abaturage. Umushinga wo Gusubiranya Agace k’Umuhora wa Nyungwe–Ruhango ushyirwa mu bikorwa na REMA ku nkunga y’Ikigega cy’Isi cy’Ibidukikije (GEF) kibinyujije muri Banki y’Isi. Biteganyijwe ko uzagira uruhare mu gusana ibidukikije byangiritse, kongera ubudahangarwa bw’ahantu hibasirwa n’ibiza no guteza imbere iterambere rirambye ry’abaturage bo mu bice uzakorwamo.